Si Palui

HAKUN BALAPAR

Palui tulak kajawa maumpati rumbungan pambakal mahadiri partamuan partanian di Malang, rumbungan palui tulakan bakapal

banyu. Ngarannya bakapal banyu tapaksa inya basangu makanan. sakaliya baluman sawat sampai kapalabuhan Perak, hanyar

satangah perjalanan, inya sudah kahabisan sangu. tapaksa inya manukar makanan di kapal, sakalinya rasa karampukan banar

inya. sakali makan haja bisa habis Rp 50.000 sampai Rp 100.000, Handak minta bayari wan pabakal, supan jua inya tapaksa

amun kawa diharitnya.


''Umpat batakunlah lui, bujur wayah bulikan tadi ikam naik pasawat terbang dan kalaparan? lalu wayah bajalan. Napa kapal

terbang itu nyaman pada bakapal banyu,'' ujar Tulamak. ''Nyaman dasar nyaman karna lakas sampai, tapi kita harus banyak

basangu duit'' ujar Paui. jadi kanapa maka sampai kalaparan? ujar Garbus umpat  batakun handak tahu. Naik kapal udara, naik

kapal banyu atawa bakarita api, aku jara-jara sudah Mak ai,'' sahut palui. ''kanapa maka jara-jar sudahLui, padahal makan

nginumnya sudah tasadia?'' ujar Tulamak.

''Wayah bakarita api matan Bandung ka surabaya kami ditawari macam-macam makanan. Makanya aku mamasan nasi gureng wan teh

es ditambah pulang wadainya ruti kijau. Kami dilayani ramah banar, lalu makanan wan nginuman itu diantar kawadah kadudukan

kamidan dibari sarbit gasan lap muha. Lalu imbah tuntung, piring wan cangkir diputikinya sakaligus manjulung bon

tagihannya, Eee.... sakalinya haraganya larang banar, pas-pasan duit dikantung, ''ujar Palui pina manyasal.

''Jadi itulah nang ikam padahakan bahwa ikam jara-jara sudah itu Lui?'' ujar Gabus. ''Hiih, makanya wayah dikapal terbang

aku bapikir banara dan ahirnya kuputusakan bahwa aku wani balapar haja. Mulai duduk dikapal tarbang itu ditawari gula batu,

tapi aku kada hakun karna aku kada mambawa gula batu saurang. Lalu kada lawas tarbang mulai ditakuni apakah handak kupi

atawa teh, tapi kujawab aku kada mamn=bawa banyu butu. Kaya itu jua wayah dalam parjalanan di atas, bubuhan pramugari mulai

basusurungan makanan nasi. Taoi aku tatap kada hakun, aku bapadah masih kanyang dan kada wani makan dipasawat kalu kaina

handak bahira. Sedangan kakawalan ku dihiga bahimat makan dalam hatiku cagar ditahi ratusan ribu kaya dikarita api,'' ujar

Palui bahimat bakisah.

''Ooo.... jadi karna takutan babayar itula maka hakun balapar di pasawat tarbang? ujar Tulamak. ''Dasar bungul ikam Lui ai,

dasar urang gunung, padahal makan nginum di pasawat tarbang itu parai sudah dijamin, bahkan piring cangkir wan mangkungnya

kawa di minta gasan dibawa bulik,''ujar Gabus.
''Hiih, aku dasar bungul,''ujar Palui pina manyasal mangakui kabubungulannua

Sumber : (bpost/tam)